لماذا نطالب بقانون لعاملات المنازل؟ 

لأن عمالة الأطفال بالمنازل جريمة متكاملة 

ليلة من ليالي جنات البائسة التي تشعر فيها بالخوف وكل ما تتمناه فقط أن تنام في حضن أمها وأخواتها.. هكذا تعبر جنات التي لم تتجاوز الثانية عشر من عمرها عن مشاعرها ببراءة الأطفال..   إذا نظرت الى وجهها تشعر بالقهر والحزن رغم ابتسامتها الباهتة على شفتيها الصغيرتين..  

• بتشتغلى هنا بقالك أد أيه ياجنات؟ 

بشتغل بقالي سنتين عند المدام والدكتور

• ده كتير أوى ياجنات.. بتشتغلى ايه عن المدام؟

باخد بالى من " عبلة وفادى “كل يوم بصحيهم عشان يفطروا ويروحوا المدرسة 

• يعنى يتصحى بدري أوى كدة؟  

آه المدام بتصحينى الساعة 6 الصبح بس انا ببقي نفسي أنام أوى 

بس بصحي عشان أعمل الفطار " لعبلة وفادى " وبعدين بروح اعمل الفطار للمدام والدكتور وبعدين أروق البيت 

• أنتئ بتعرفي تروقي البيت ياجنات ولا صعب عليكى؟

آه بعرف بحط كرسي عشان أطول الحوض واغسل المواعين وبعدين باخد الكرسي وأقف عليه عشان انشر الغسيل بس مرة وقع منى في الشارع فستان المدام ضربتني وقالتلى انت جاية تدلعي ولاأيه..   والله كان غصب عنى أصلى مش بطول الحبل..

• طيب وبتنامى امتى بليل ياجنات؟

بنام بعد ما تنام "عبلة وفادى " وأغسل مواعين العشاء واعمل شاي للمدام 

• طيب امال بتكلى أنتى امتى كدة؟ 

بأكل بعد ما أخلص وساعات ببقي تعبانة مش بأكل عشان ببقي عاوزة أنام أوى

• انتى بتشوفي ماما واخواتك ياجنات؟

لا بشوف أبويا بس كل شهر لما يجي ياخد الشهرية بتاعتى ويقولى خليكى جدعة وأسمع الكلام وأوعى تقولي لأ على أي حاجة عشان أخواتك الصغيرين يلاقوا يكلوا   

• طيب ماما بتشوفيها هي واخواتك امتى امال؟

بعد العيد أبويا بيجى ياخدنى اعد أسبوع معاهم بس ده حبة صغيرة أوى ببقى نفسي أعد مع أمي وأخواتي والعب معاهم زي زمان لما كنت صغيرة  

• طب ماانتى لسة صغيرة ياجنات 

لا المدام وابويا فيقولوا انى كبرت وابويا بيقولى أنتى الى بتأكلي أخواتك عشان أنتى الكبيرة.

الحوار ده أصعب من أنه يتوصف بكلام جنات 12 سنة " عاملة منزل " هي الى بتصرف على أسرتها عشان أمها مش بتشتغل بتربي أخوتها الثلاثة الصغيرين وأبوها فلاح بس مش لاقى شغل.

• هكذا نرى أن عمالة الأطفال جريمة متكاملة رغم أن الباب الخامس من قانون الطفل في المادة (64) إلى المادة (69). حدد شروط تشغيل الأطفال من حيث السن وساعات العمل. كذلك التسجيل لدى مكاتب القوى العاملة إلى جانب الرعاية الصحية. كما حظر في مادة (65) المهن التي لا يجوز تشغيل الأطفال فيها.

• لكن رغم أن قانون الطفل يسري على جميع قطاعات العمل دون استثناء. إلا أنه لايزال تفتيش العمل يتقيد باستثناءات قانون العمل رقم 12 لسنة 2003 للأطفال والفتيات العاملات بالخدمة بالمنازل. 

• بينما تنص المادة 80 من الدستور المصري " بالتزام الدولة برعاية الطفل وحمايته من جميع أشكال العنف والإساءة، وسوء المعاملة، والاستغلال الجنسي والتجاري. كما يحظر تشغيله قبل تجاوز سن إتمام التعليم الأساسي. ويحظر تشغيله في الأعمال التي تعرضه للخطر”.