الحكاية الثانية : أم أحمد

مقالات
الخميس, أكتوبر 14, 2021 - 14:28
  • حكايتنا الثانية مع ام أحمد  

- معلش مش حنقدر ندخلك البيت الفترة دية .

- طيب حتدونى اليومية ؟

-لا طبعا لما تبقى ترجعي الشغل إن شاء الله أستني لما نشوف الدنيا حيحصل فيها أيه .

 

 "وجع قلب وخوف عشتهم  أنا وعيالي أيام كورونا فجأة لاقيت كل الأبواب مقفولة أدامى كل البيوت ألى بشتغل فيها كانت خايفة منى وعندها حق ما كل الناس كانت خايفة بس أنا كمان وعيالى ناكل منين  ؟أنا بشتغل باليوم عند كل أسرة  ماكنتش عارفة  اعمل  أيه , طيب أعيش أزاي ؟ أاكل  عيالي منين ؟

 ده  كمان جوزي بيشتغل باليومية يكسر حيطة لحد يشيل حاجة من البيوت كده يعنى هو كمان قعد في البيت مش لاقى حد يشغله كل الناس خايفة تدخل أغراب البيت...  سمع جوزي عن إعانة الدولة لكورونا  300 جنيه بس معرفناش نقدم قالوا بالكمبيوتر طب وده نجيبه منين ولا نكتب عليه أزاي بقيت  الجيران  تدينا اللي تقدر عليه ما هما كمان مش لاقين يكلوا زينا  .

 كنت  كل يوم ابص في وش عيالي الثلاثة  وأحس بقهرة القلب عليهم  مش عارفة اجبلهم عيش  حتى حاف  مع انى بقالي  24سنة بشتغل حتى قبل ما أجوز قعدنا على الحال ده سنة مش لاقين حد يشغلنا.

 

يعنى لو كان عندي معاش ولا أي حاجة تضمن ان لما استغنوا عنى أصحاب البيت كنت قدرت أعيش وأصرف على البيت لكن كمان جوزي بيشتغل على باب الله باليوم ومالوش برضه معاش وادينا عايشين اليوم بيومه دلوقتى بعد ما بعض أصحاب البيوت رجعتني من كام شهر "

 

 

  • يعنى انتى عاوزة يبقالك معاش؟

أيوة طبعا نفسي عشان مبقاش خايفة من بكرة خصوصا انى بقيت بكبر ومش بقدر  اشتغل بنفس قوتى زمان

  •            طيب المعاش ده حيخليكى تدفعي فلوس في التأمينات مع الاسرة اللي بتشتغلى عندها يعنى فلوسك حتنقص شوية
  •                        مش مهم تنقص شوية بس لما أعد في البيت ألاقى دخل ثابت ليا يسترني انا وعيالى .

 

 

 

 

إضافة تعليق جديد